फलसफे

kisi ki aur, kisise door,

pal ki azaadi dhundhta, saalon se majboor,

sapno ko haqeqat se jod,

chhilte kadmo ki andhi daud,

Aakhon mein paani, hothon par sharbat ki pyaas,

patjhad ka patta phir bhi oas ke mijaaz,

pahaad tha kabhi kadmo tale,

ab khaai mein koodta yeh mann chale..

Milti nahi

milti nahi….
khwabo ki woh kadi,
jo le chale hume,
us sire tak,
jaha,
sach hoti zindagi,
jhoothi naa lage,
khushi mere haathon ko achhuti naa lage,

milti nahi,
palon ki woh ladi,
jo haseen waqt ki,

dhadkano ko
saans deti rahe,

bheetar samaye andhero ko
asmaan se churakar,
zara si chaandi,
raat deti rahe…

Badalta waqt badalte log

Jinse moodne ki umeed thi,

unhone palatke bhi naa dekha,

arse baad jab takraaye,

toh pata chala,

waqt ne unhe ek hunar sikhaya hai

jaankar anjaan banne ka….

Jinse roshni ki umeed thi,

wahi raat de gaye,

jiski subeh woh apne saath le gaye,

sau baar utthe hum us raat mein,

par khidki par sirf andhera dikhta tha

aur parda sarkaane ki himmat rahi naa thi,

Baahar Nikal

baahar nikal..
darr se,
maayus manzar se,
zehen mein khayalon ke safar se,

baahar nikal…
wahi se jaha tu gira nahi,
par phir bhi khadde ko khaayi samajh baitha hai,
wahi se jahan tu maraa nahi ,
par chal rahi duniya ki raftaar se darkar  laash ki tarah leta hai

baahar nikal…..
patthar sa kab tak tootega,
kankar se jwalamukhi nahi phootega,
barf ki tarah soch …bas pighal…

baahar nikal
ab baahar nikal