Hope

उम्मीद को जरा सी हवा दो,

पतझड़ भी थोड़ा खुशनुमा हो….

Thought

• 

Khushi ka maara

Gum se woh kabhi nahi mara,

par ek khushi uski rooh ko jism se nikaal le gayi

Shikva aur shikaayatein

Shikaayat mein kahin bharosa tha,
shikva mein uske tootne ka darr.

Shikaayat dhero labzo ki ek dhaar thi,
shikva khamosh lehron ke saamne nakaam hoti ek patvaar thi.

Shikaayat samajhdaari ki daal se gire sabr se ghayal thi,
shikva waqt ki shaakh pe lipti umeed ki kaayal thi.

Wahi zindagi…

Umr aur waqt se aage badhe,
par khayaal umeedon aur yaadon ke beech wahi the.

Auhde aur zimmedaari se aage badhe,
par faasla ghar aur naukri ke beech wahi tha.

Nakaamiyo aur hatasha se aage badhe,
par “yun hota toh kya hota” is haseen sapne aur haqeqat ke beech palkon ke jhapak wahi thi.

Kuch kadmo ke saath chalne aur kuch haatho ke chhotne se aage badhe,
par nayaab mehfilo aur bhoola denewale vaakyo ke beech log wahi the.

Unchaahe jawaab

Kuch bin maange, kuch bewaqt mile,
jinse bach nikalna chaha,
wahi raaste mein pade mile.

Teekhe labzo ko odhkar,
hamesha mere sawalon ko bepata chhodkar woh aye,
par unki sachhai meri umeed ko itna raund gayi,
ki mann jhoothi tasalli chahne laga.

Khamoshi mein milkar ek goonj de gaye,
jisse aaj bhi meri khamoshiyaan pareshaan hoti hai,
zindagi shayad dhero unsuljhe sawaalo se kuch unchaahe jawaab peeroti hai

Nazariya

Nazariya rakhta hun,
kuch haalaato ne khaara kar diya is jheel ko,
isliye dariya rakhta hun.

Par tajoorbe ko kisi nazariye mein shaamil nahi karta,
khayaal ko tay karne deta hun apna safar ,
kuch kati patango se maayus hokar,
yeh hausla uski udaan ka kaatil nahi banta

Yaadien

Is pal mein beete pal ko ghar deta hai,
patjhad mein guzri bahaarein bhar deta hai,

naye ghar mein puraani deewar dhundhta hai,
toote pool pe puraane safar boonta hai,

kal ko pareshaan kiye bina,
insaan aaj mein koi kaam nahi karta,
chaar deewari mein din bhar karle laakh jatan,
par yaadon ke jharokho ke bagair koi shaam nahi karta

Pyaas

Thamne aur thaamne ki jaddo-jehed thi,

aakhon mein tairta khara paani,

labo pe raengti kuch aakhri boondein shehed ki….lekar..

naa jaane kis pyaas mein jee rahe the...

Zindagi ka falsafa

Waqt kuch aise guzra,
mein wahi ruka raha,
aur
raaste ne apni chaal chal di…

Safar kuch aise guzra,
mein auro ke nishaan pe chalta raha,
aur
ek gehri khaayi ne meri subeh ki umeed masal di,

Rishto ka karvaan kuch aise guzra,
mein unke jasbaat sambhaalne mein uljha raha,
aur
woh apno ki kataarein mujhe hisaab bataakar aage badh li