Unchaahe jawaab

Kuch bin maange, kuch bewaqt mile,
jinse bach nikalna chaha,
wahi raaste mein pade mile.

Teekhe labzo ko odhkar,
hamesha mere sawalon ko bepata chhodkar woh aye,
par unki sachhai meri umeed ko itna raund gayi,
ki mann jhoothi tasalli chahne laga.

Khamoshi mein milkar ek goonj de gaye,
jisse aaj bhi meri khamoshiyaan pareshaan hoti hai,
zindagi shayad dhero unsuljhe sawaalo se kuch unchaahe jawaab peeroti hai

Yaadien

Is pal mein beete pal ko ghar deta hai,
patjhad mein guzri bahaarein bhar deta hai,

naye ghar mein puraani deewar dhundhta hai,
toote pool pe puraane safar boonta hai,

kal ko pareshaan kiye bina,
insaan aaj mein koi kaam nahi karta,
chaar deewari mein din bhar karle laakh jatan,
par yaadon ke jharokho ke bagair koi shaam nahi karta

Zindagi ka falsafa

Waqt kuch aise guzra,
mein wahi ruka raha,
aur
raaste ne apni chaal chal di…

Safar kuch aise guzra,
mein auro ke nishaan pe chalta raha,
aur
ek gehri khaayi ne meri subeh ki umeed masal di,

Rishto ka karvaan kuch aise guzra,
mein unke jasbaat sambhaalne mein uljha raha,
aur
woh apno ki kataarein mujhe hisaab bataakar aage badh li

Samundar

Gamo ke samandar mein aankhein taair ti hai,

ab behna bhi nahi aur rehna bhi yahi,
toh dono har raat alag alag nikalti hai

kinaaro ki talaash mein,
meethe paani ki pyaas mein,

kya yeh bas khwab bhar hai,
ya mumkin si baat,

yeh sochkar laut aati hai palkon ke pichhe,
sametkar raat bhar bikhre jasbaat…

Mijaaz – e- khushi

Dil khush hai,
jo haal hai, jo haalaat hai,
kuch jawaab sukoon deete,
khade kuch sawaalaat hai,
par dil khush hai.

Jahan hona tha, waha shaayad nahi
par jaha hun, uski shikaaayat nahi. kum hun ya zyada, tulna ki baat hai,
par kaafi hun, yeh sochkar dil khush hai.

Din bhar mein kuch khayaaal,
kahi kuch baato ka malaal,
mann dohrata hai,
jaise main mujhse hi ladh raha hun,
kuch chubhti – akharti chizon ko liye,
apni mauj mein aage badh raha hun.
sab kuch ekdum se bhula dene ka hunar nahi hai shaayad,
par dil khush hai,

Khush hun iska matlab yeh nahi,
ki chehre pe 24 ghante muskurahat rehti hai,
maayusi bhi kabhi kabhi apna kiraya deti hai.

Haar nahi maani, hathiyaar nahi daale,
zindagi ki is moothbhed mein,
bahut se achhe pal ate rahe hai,
inhe jeekar, mehsus kar

dil khush hai….

Phool ke pankh

Khushbu thi us phool mein,
kar baitha ek bhool main,
use tod liya.

Kuch der baad woh murjhaane laga,
main bhi ghar jaane laga,
tabhi woh bola,

“Marne se pehle mujhe udna hai,
pal do pal hi sahi,
hawaaon pe savaar hona hai,
us titli ki tarah,
jo mujhe aksar chiddha jaati thi,
hawa chalti,
aur woh kahin door nikal jaati thi.. “

Maine apni khwaish puri kar li,
ab uski karne ka waqt tha,

Hawa ke khilaaf halki si mutthi khol di,
aur uski pankhudiyon ko pankh mein tabdeel hote dekha,

Bujhte diye ko jaise asmaan ki mehfil hote dekha

Chaand pe ek Kavita

Suna tha chaand aaj kal kisi do kamre wale makaan mein kiraaye se rehta hai,

aaj dekh liya,
ek darwaaze se nikla, parde ko kinaare karta hua,
Waise hi jaise asmaan mein badalon ko karta hai,

Use shayaad pata tha,
ki maine dekh liya, toh uspar ek kavita zarur likhunga,
isliye
usne apna naam bhi yaha “Kavita” bataya hai,

Chaand pe daag hua karta tha,
par is Kavita pe toh nahi hai,
nazar naa lage insaano ki,
isliye usne maathe par teeka lagaya tha

Toh bas kuch aise chaand bana “Kavita”