Khud se ek mulaqat

dil ki gehrai mein,
andheri khaai mein,
khudse ladaai mein,

lamhe khaas milenge,
raaz milenge,
zakhm naraaz milenge,

dhundh mein apni sirat se saamna hoga,
bachke nikalna asaan na hoga,
dhadkano ko halki pareshaani hogi,

is mulaqat ki hogi itni ki kahaani,
kuch gehri saansein aur aakhon se behta paani.






Ateet

Haan ateet apne vartamaaan mein itna sundar nahi hota,
uski sundarta beet te waqt ke saath badhti hai.

Ateet ek jagah hai mere liye,
jaha mein baar baar jata hun,
kyunki woh meri zindagi ki haqeeqat thi kisi waqt,
toh ekdum yathaarth bhi nahi hai.

Waha jaakar lagta hai
jaise kisine vartamaan ka bojh aur pareshaani niche rakh dene ka mauka diya ho,
thik usi tarah jis tarah school mein kisi period mein daant padi ho,
par recess ka maza phir bhi aa raha ho.

Wahi zindagi…

Umr aur waqt se aage badhe,
par khayaal umeedon aur yaadon ke beech wahi the.

Auhde aur zimmedaari se aage badhe,
par faasla ghar aur naukri ke beech wahi tha.

Nakaamiyo aur hatasha se aage badhe,
par “yun hota toh kya hota” is haseen sapne aur haqeqat ke beech palkon ke jhapak wahi thi.

Kuch kadmo ke saath chalne aur kuch haatho ke chhotne se aage badhe,
par nayaab mehfilo aur bhoola denewale vaakyo ke beech log wahi the.

Zindagi ka falsafa

Waqt kuch aise guzra,
mein wahi ruka raha,
aur
raaste ne apni chaal chal di…

Safar kuch aise guzra,
mein auro ke nishaan pe chalta raha,
aur
ek gehri khaayi ne meri subeh ki umeed masal di,

Rishto ka karvaan kuch aise guzra,
mein unke jasbaat sambhaalne mein uljha raha,
aur
woh apno ki kataarein mujhe hisaab bataakar aage badh li